மலையாள திரையுலகின் முன்னணி நட்சத்திர நடிகரான ஆண்டனி வர்கீஸ் நடித்திருக்கும் ‘7 ஸ்டார் பாய்ஸ்’ திரைப்படத்தின் வெளியீட்டு தேதி அறிவிக்கப்பட்டிருக்கிறது. இத்திரைப்படம் செப்டம்பர் மாதம் 4 ஆம் தேதி தமிழகம் முழுவதும் திரையரங்குகளில் வெளியாகிறது.
இயக்குநர் நிகில் பிரேம் ராஜ் இயக்கத்தில் உருவாகியுள்ள ‘7 ஸ்டார் பாய்ஸ்’ திரைப்படத்தில் ஆண்டனி வர்கீஸ், இந்திய கால்பந்தாட்ட அணியின் முன்னாள் வீரரான ‘ பிகில்’ ஐ எம் விஜயன் ஆகியோர் நடித்திருக்கிறார்கள். ஃபயஸ் சித்திக் ஒளிப்பதிவு செய்திருக்கும் இந்த திரைப்படத்திற்கு ஜேக்ஸ் பிஜாய் இசையமைத்திருக்கிறார். கால்பந்தாட்ட விளையாட்டு பின்னணியில் மலையாளத்தில் ‘ஆனபரம்பிலே வேர்ல்டு கப்’ என்ற பெயரில் வெளியாகி பெரும் வரவேற்பை பெற்ற இந்த திரைப்படத்தை பீனிக்ஸ் ஸ்டுடியோ நிறுவனத்தின் தயாரிப்பாளர் டி. அசோக் தமிழில் மொழி மாற்றம் செய்து வெளியிடுகிறார்.
படத்தை பற்றி தயாரிப்பாளர் டி . அசோக் பேசுகையில், ” செவன் ஸ்டார் பாய்ஸ் – ஃபுட்பால் சம்பந்தமான ஸ்போர்ட்ஸ் டிராமா திரைப்படம். இதில் கால்பந்து விளையாட வேண்டும் என தீராத ஆர்வம் கொண்ட 12 வயதிற்கு உட்பட்ட சிறார்கள்.. உள்ளூரில் நடைபெறும் விளையாட்டுப் போட்டிகளின் போது மைதானத்தில் அனைவரது கவனத்தையும் கவரும் வகையில் திறமையான விளையாடும் ஆண்டனி வர்கீஸை தங்களுடைய ரோல் மாடல் நாயகனாக கருதுகிறார்கள். இவர்கள் கால்பந்து விளையாட விரும்பினாலும் அதற்கு ஏற்ற மைதானம் கிடைக்காமல் கஷ்டப்படுகிறார்கள். இதை தெரிந்து கொண்ட ஆண்டனி வர்கீஸ் இவர்களுக்காக ஒரு மைதானத்தை ஏற்படுத்தித் தருகிறார். அந்த மைதானத்தில் சிறார்கள் உற்சாகமாக கால்பந்து விளையாடுவதையும், அவர்கள் நுட்பமாக விளையாடுவதையும் பார்த்து வியக்கும் ஆண்டனி வர்கீஸ்… அவர்களுக்கு பயிற்சியாளர் ஒருவர் கிடைத்தால் அவர்களின் திறமைக்கு அங்கீகாரம் கிடைக்கும் என நினைத்து, கால்பந்து விளையாட்டின் பிரபல பயிற்சியாளரான ஐ. எம். விஜயனை அணுகுகிறார். அதன் பிறகு சிறார்கள் கால்பந்து விளையாட்டின் அனைத்து நுட்பங்களையும் கற்றுக் கொண்டு போட்டிகளில் கலந்து கொள்கிறார்கள். மாநில அளவில் நடக்கும் போட்டிகளில் அவர்கள் கோப்பையை வெல்கிறார்களா? இல்லையா? என்பதுதான் இப்படத்தின் கதை. தமிழ்நாட்டில் ‘மஞ்சும்மல் பாய்ஸ் ‘ படத்திற்கு கிடைத்த வரவேற்பை போல்… இந்த ‘ 7 ஸ்டார் பாய்ஸ்’ படத்திற்கும் கிடைக்கும் என எதிர்பார்க்கிறேன்” என்றார்.