வானே வானே..’ பாடலால் தொடங்கிய துல்கர் சல்மானின் ‘ஸ்ரீ ஸ்ரீ’ இசைப் பயணம்

‘
பன்முகத் திறமை கொண்ட நடிகர் துல்கர் சல்மான், அறிமுக இயக்குநர் ரவி நெலகுதிடி இயக்கத்தில் தனது 41-வது திரைப்படமான ‘ஸ்ரீ ஸ்ரீ’ படத்தில் நடித்து வருகிறார். எஸ்.எல்.வி. சினிமாஸ் நிறுவனத்தின் பத்தாவது பிரம்மாண்ட தயாரிப்பாக உருவாகும் இப்படத்தை தயாரிப்பாளர் சுதாகர் செருகூரி தயாரிக்க, இஷான் சக்சேனா இணை தயாரிப்பாளராக பணியாற்றுகிறார்.
துல்கர் சல்மான் மற்றும் பூஜா ஹெக்டே முதன்முறையாக ஜோடி சேரும் இந்தப் படம், காதல், நகைச்சுவை மற்றும் உணர்வுபூர்வமான தருணங்கள் நிறைந்த புத்துணர்ச்சியான காதல் திரைப்படமாக உருவாகி வருகிறது. ஏற்கனவே வெளியான ஃபர்ஸ்ட் லுக் போஸ்டர் மற்றும் படப்பிடிப்பு தளக் காட்சிகள் ரசிகர்களிடம் நல்ல வரவேற்பைப் பெற்ற நிலையில், தற்போது ‘வானே வானே..’ என்ற முதல் பாடல் வெளியாகி படத்தின் இசைப் பயணத்தை தொடங்கியுள்ளது.
ரயில் நிலையத்தில் துல்கர் சல்மான், நடைமேடையில் நுழையும் பூஜா ஹெக்டேவை முதன்முறையாகக் காணும் தருணத்தில் பாடல் தொடங்குகிறது. பின்னர் இருவரும் இணைந்து பகிர்ந்து கொள்ளும் மகிழ்ச்சியான பயணத் தருணங்கள் அழகிய மாண்டேஜ் காட்சிகளாக அமைக்கப்பட்டுள்ளன. காதலின் மென்மையான உணர்வுகளை காட்சிகளும் இசையும் இணைந்து சிறப்பாக வெளிப்படுத்துகின்றன.
இசையமைப்பாளர் ஜி.வி. பிரகாஷ் குமார், மனதை வருடும் இனிமையான மெலடியை வழங்கியுள்ளார். முதல் முறை கேட்கும் போதே மனதில் பதியும் வகையில் அமைந்துள்ள இந்தப் பாடலுக்கு, பாடலாசிரியர் கே.ஆர். தரன் காதலின் ஆழமான உணர்வுகளை கவித்துவமாக வரிகளில் வடித்துள்ளார். பின்னணிப் பாடகர் நகுல் அபயங்கரின் உணர்வுபூர்வமான குரலும், ராம் மாஸ்டரின் நடன அமைப்பும் பாடலுக்கு கூடுதல் அழகைச் சேர்க்கின்றன.
பாடலின் முக்கிய பலமாக துல்கர் சல்மான் மற்றும் பூஜா ஹெக்டே இடையேயான இயல்பான திரைவேதியியல் (Chemistry) அமைந்துள்ளது. இருவரின் வசீகரமான தோற்றமும், இயல்பான நடிப்பும் காதல் உணர்வை மேலும் வலுப்படுத்துகின்றன. இயற்கை எழில் நிறைந்த இடங்களில் படமாக்கப்பட்ட காட்சிகள் பாடலின் காட்சியமைப்பை மேலும் மெருகூட்டுகின்றன.
ஒளிப்பதிவை அனய் ஓம் கோஸ்வாமி மேற்கொண்டுள்ள நிலையில், தயாரிப்பு வடிவமைப்பை அவினாஷ் கொல்லா கவனித்துள்ளார். வலுவான தொழில்நுட்பக் குழுவுடன் உருவாகும் இந்தப் படம், பார்வையாளர்களுக்கு அழகிய காட்சிகளும் உணர்வுபூர்வமான அனுபவமும் வழங்கும் என எதிர்பார்க்கப்படுகிறது.
பான் இந்திய திரைப்படமாக உருவாகும் ‘ஸ்ரீ ஸ்ரீ’, தமிழ், தெலுங்கு, மலையாளம், கன்னடம் மற்றும் இந்தி ஆகிய ஐந்து மொழிகளில் திரையரங்குகளில் வெளியாக உள்ளது. தற்போது வெளியாகியுள்ள ‘வானே வானே..’ பாடல், ரசிகர்களிடையே நல்ல வரவேற்பைப் பெற்று, படத்தின் மீதான எதிர்பார்ப்பை மேலும் அதிகரித்துள்ளது.